السلام عليكم ورحمة الله وبركاته ♥♥
طلبت قبل فتره من موقع اي هيرب : متجر امريكي يشحن وورلد وايد ( كل العالم ) ..
ويوفر منتجات عضويه صحيه خاليه من الكيماويات وعنده اعشاب ومنتجات ديتوكس وعنايه
بالنسبه للاعشاب عنده عضويه ونقيه 100٪ اشوفها افضل من العطارين (الحواج) لأن ماندري شلون تم تخزين الاشياء!
ولاندري اذا صج نقيه اومخلوط وياها شي فاللي تبي تضمن جودة الشي اللي بتشتريه اشوف انها بتحب الموقع هذا غير انه يمكن يطلع ارخص او نفس السعر !!
الموقع ايظا في مستحضرات تجميل ومكملات غذائيه واطعمه وشاي ديتوكس واشياء متعدده لو تصفحتوه بتحبونه انا واثقه!
شنو اللي يخليني اطلب iherb ؟
١- اسعارهم مميزه
٢- سياسة الاسترجاع في حالة تلف المنتجات عند الشحن او لاسمح الله البرودكت انكت "نادر" ماتسير ..
٣- جودة المنتجات
٤-تعامل عالمي وشركة اي هيرب ضخمه ومستودعهم مكيف وحريصين على المنتجات
٥- عندهم عروض خاصه ودايم اذا اول مره تطلبين لاتنسين تحطين كود الخصم ..
هذا فيديو توضيحي للمخزن اللي يشحنون منه :
طلبيتي
كانت بتاريخ ٢٨-٦-٢٠١٦
وصلت لي بتاريخ ٢-٧-٢٠١٦
قعدت ٤ ايام بالضبط ووصلتني ، يومين بالجمارك بالكويت .. خذا مني الشحن ٣دنانير من الموقع ودفعتهم عن طريق الفيزا
شحنت عن طريق دي اتش ال ولما وصل دفعت ٧ دنانير لمندوب التوصيل لانهم يحسبون المجموع الكلي لوزن الشحنه ..
مشترياتي من ايهيرب
- منتجات عنايه وزيوت للشعر والجسم
- اغذيه صحيه
- كريمات خاصه بالحمل والستريج مارك ( راح اتكلم عنهم بتدوينه خاصه )!
- مرطبات شفايف وكريمات للوجه
... ♥♥
بالنسبه للزيوت اللي اشتريتها .. كان بخاطري اخذ جم زيت بعد بس نطرت يومين وحطيتهم بقائمة الانتظار
ولما شفت السالفه مطوله قلت بعديين ! وسبحان الله اشتريت وخلصت الصبح العصر دازين لي ايميل رجعوا يوفرونهم ههههه!
coconut oil - زيت جوز الهند العضوي
استخداماته متعدده للبشره والجسم وصالح للأكل بعد
extra virgin يعني بكر وعضوي .. بعكس اللي بالجمعيات يمكن نلاقيه مكرر
اول ماوصلني كان سايح مع جزيئات صغيره بيضاء اتوقع لو خليتوه بمكان بارد بيسير قوامه اثقل ولونه ابيض ..
castor oil - زيت الخروع النقي 100%
معروفه فوايده لانبات الشعر وتنعيمه وتطويله ..
وبالملصق المكتوب ورا المنتج انه ينفع بعد للجسم ( وضع قطرات صغيره مع عمل مساج ) ..
وريحته ! سبق وشريت من العطار خروع وقالي انه اصلي بس ريحته ماكانت حلوه ابداً
هذا من دون مبالغه مافيه ريحه خفيييفه حيل بس لاحظت ان الزيت ثقيل ويعتبر من الزيوت اللزجه
اللي غلط اننا نخلطه مع زيت لزج ثاني ولا راح يضرنا ماراح ينفعنا
لازم تكون الخلطه ( زيت لزج + زيت خفيف )
مثلا نقدر نخلط ( زيت جوز الهند "بارد-خفيف" + زيت الخروع "حار- ثقيل" )
وهذي نبذه عن انواع الزيوت البارده والحاره :
الزيوت الباردة زيت اللوز الحلو والمر _ زيت الخردل _ زيت الحبة السوداء _ زيت الجرجير _ زيت اكليل الجبل _ زيت الجوجبا _ زيت السمسم _ زيت جنين القمح _ زيت النعناع _ زيت الذرة _ زيت عباد الشمس الزيوت الحارة زيت الزيتون _ زيت الثوم _ زيت البصل _ زيت الحلبة _ زيت القرفة _ زيت الاس _ زيت السدر _ زيت الزنجبيل .
almond oil - زيت اللوز النقي الطبيعي 100%
هالنوع من الزيوت يكون غني بيفتامين e .. استخداماته متعدده للوجه والشعر والجسم
يخفف من الهالات السودا حول العين
وقطرات منه مع زيت الخروع عالرموش يساعد على تقويتهم وتطويلهم
وهو يعتبر آمن للاستخدام في محيط العين والجفون
نقدر نخلط منه قطرات مع السكرب او المقشر للجسم فيه نسبة ترطيب حلوه ويقولون يقلل من الستريج مارك !
shea nut oil - زيت الشيا النقي
فوائد الشيا معروفه ودايم نسمع عنها واهمها الترطيب الغني للجسم وفروة الراس واللي حاب يقرا اكثر بخصوص الشيا الخام يبحث بقوقل ويقرا ♥♥ ..
مكتوب : للاستخدام اليومي للجسم وضع قطرات منه للترطيب العميق
مثلا لوشن الترطيب اللي تستخدمونه تقدرون تنقطون عليه من زيت الشيا وتستخدمونه للترطيب اليومي
اما اذا كان للشعر ..
وشعركم مبلل بعد الشور قطرتين او ثلاث منه على فروة الراس مع مساج خفيف هالشي يحمي
الشعر من عوامل المناخ القاسيه ( البرد- الحر)
jojoba oil - زيت الجوجوبا النقي 100%
يعتبر زيت مرطب ومنظف للبشره وهو من الاكثر مبيعاً
يقلل من الاثار والحبوب بالوجه والجسم ويقلل من التجاعيد والتشققات ويعتبر من الزيوت المطهره للبشره الحساسه
ومنظفه بحيث انه ينفع كوسيله لمسح المكياج وتنظيف البشره ولو اني ماحب اغسل الميك اب بزيت!
وللي بشرتهم حساسه مايسبب احمرار ولا حساسيه عند استخدامه ويعتبر امن جداً على البشره ...
السبب الرئيسي اني اشتريته هو انه يقلل من علامات التمدد والخطوط البيضاء من الحمل وزيادة الوزن
shea butter - زبدة الشيا العضويه
المنتج هذا يعتبر من دون رائحه لونه ابيض ومكتوب بالملصق خلف المنتج انه يتاثر بدرجة حرارة الغرفه والمكان
يعني يمكن يكون قاسي اذا كان بمكان بارد ويذوب مع حرارة الجسم عند الاستخدام
اول ماستخدمته عجبني ترطيبه شلون عميق وحلو ويقولون احسن استخدام له لما يكون الجسم رطب بعد الشور
مع الاستخدام بيعطيكم نعووومه للجسم وترطيب خيال بصراحه من اكثر المنتجات اللي حبيتها ♥♥♥♥ ..
african black soap - الصابونه الافريقيه السوداء
هذي الصابونه من مكوناتها انها مع الشوفان والصبار وفيتامين e .. شكل الصابونه اسود مع قطع صغيره داخلها بيضاء
مكتوب ان هالقطع اهي الشوفان الطبيعي .. هالمنتج من افضل المبيعات ب اي هيرب !
الصابونه هذي فيها نسبة ترطيب عاليه وف بعض التقييمات ذكرو انهم استغنو عن المرطب بعدها امم ماتوقع هالشي صح !
استخدموها الافريقين قبل لعلاج مشاكل البشره من اكزيما وحب الشباب
تحتوي على ( رماد سعف النخل - قشور الموز - خلاصة التمر الهندي - زبدة الشيا ... ) وهي مناسبه لجميع انواع البشره
صحيح فيها نسبة ترطيب بس انها ماتترك دهون زايده عالبشره وتعتبر ديتوكس مطهر ومنظف عميق للبشره
استخدموها يوميا لنتايج افضل مرتين باليوم على الاقل ..
african black soap.. body wash - الصابونه الافريقيه السوداء للجسم
نفس مكونات الصابونيه فوق مع نسبة تقشير وازاله للجلد الميت وللبشره اللي تعاني من حب الشباب
ويقلل من علامات التمدد والسلولايت !
هالصابونيتين من ضمن مجموعه ( صابونة وجه - صابونة جسم - مرطب للجسم - مزيل عرق - مرطب لليدين ) كلها عضويه من افريقيا
بس حبيت ابدا ب هالمنتجين ومتحمسه اجربهم لأنهم من البست سلر ب اي هيرب ♥ ..
collagen beauty cream - كريم الكولاجين
اطلقوا عليه العديد ب ( كريم الجمال ) نسبه لترطيبه واثره في شد البشره وتبييضها ..
وهو كريم مرطب يستخدم في الصباح والمساء قبل النوم عالوجه والرقبه نسبة التقييم لهالكريم عاليه
وعليه مدح كثير .. نجربه ونعلمكم بالنتايح ان شاء الله ♥♥ ..
vitamin e cream - كريم فيتامين اي
استخداماته للبشره .. الوجه - الجسم
فيه كمية ترطيب عميقه ويستخدم للبشره الجافه يعيد حيويه البشره ويعالج الستريج مارك وعلامات التمدد
ويعطي نظاره ويجدد منظر البشره المتعبه عليه مدح كبييير و
لنتايج افضل استخدموه يوميا مرتين اقل شي ..
sierra bees shea butter &argan oil lip balm - مرطبات الشفايف العضويه من سييرا
تعتبر هالمرطبات من افضل المبيعات ب ايهيرب فيهم نسبة ترطيب عاليه وروائحهم جداً جميله ..
وهي مجموعه من ٨ مرطبات بفليڤر غير يجتمعون كلهم بمكونين رئيسيين اللي هم شمع العسل العضوي وفيتامين إي وهذي الانواع ..
- زبدة الككاو
- العسل
- النعناع
- الرمان
- غير منكهه
- زبدة الشيا وزيت الارقان
- الشاي والتامانو
- الفانيليا
cocoa butter formula - زبدة الككاو للحامل وعلامات التمدد
هالثلاث منتجات حابه اتكلم فيهم بالتفصيل بعدين وف تدوينه غير
بسولف لكم شوي وبفضفض ههههه ♥♥♥ ..
قسم الاغذيه اخترت ٣ منتجات حابه اجربهم ..
pregnancy tea - شاي عضوي خاص للحوامل
راح اتكلم عنه مع المنتجات الخاصه بالحمل في تدوينه جايه ان شاء الله .
white chia seed - بذور التشيا البيضاء
- أصلها و من وين جات ؟
موطن البذور الاصلي من المكسيك والتشيا هي النوع الاسباني من المراميه وتتميز ان مالها طعم !
كانو يقدمونها قبل ف المكسيك مطحونه مع الماء والليمون والسكر وهالشراب تقليدي عندهم إسمه ( تشيا فربسكا)
- فوائدها ؟
تحتوي على العديد من الالياف ، اوميقا ٣ ، الكالسيوم ، وتتحكم بنسبة الكوليسترول ف الدم ومفيده جداً لمرضى السكري
بحيث انها تتحكم بسرعة عملية الهضم وتخفض من نسبة الكوليسترول الضار
- شلون نستخدمها ؟
مع كل شي هههه! حرفياً نقدر نحطها بالسلطات و المعجنات و العصاير ومع اليوقرت
تعتبر اضافه صحيه لأكلاتنا ومفيده جداً للي يبحث عن الطعم اللذيذ والفايده ♥♥ ...
ys bee farms - عسل الزهور البريه المنوعه
هالمنتج من البست سلر ف قسم المأكولات وعليه نسبة تقييم عاليه .. حاليا صايمه وانا اكتب هالتدوينه
ودي ابطل العلبه واذوق بعد الاذان ان شاء الله هههههه !
يستخدم بديل السكر ف المشروبات والمعجنات وبأكلكم عموماً
وهو محبب للأطفال كونه يحتوي على نسبة سكر .. أنا احبه الصبح مع قطعة توست محمصه وجبن فيلادلفيا/كيري
وبالعافيه < بصوت ١٥ ثانيه ههههه ♥♥♥♥
وهني اكون خلصت هذي شحنتي كامله من اي هيرب - اتمنى اكون فدتكم
لأي اسئله زياده تقدرون تتواصلون معاي عن طريق
الانستقرام : reemani.28@
السناب شات :reemani.28@
الايميل : reemani.28@hotmail.com
xoxo , luv u a all
