السلام عليكم ورحمة الله وبركاته ♥♥
قبل فتره طلبت من موقع اي هيرب منتجات عنايه وغذاء .. ومنها هالاشياء المخصصه للحامل ..
خلال فترة الحمل و اول ٣ شهور نزل وزني بشكل ملحوظ وكنت خايفه لان اعتبرت هالشي مضر وشلون الجنين يكبر دامني اضعف وماكان عندي بطن ابد! .. وسبب نقص وزني اتوقع من الوحام .. توحمت ع اكل الطباخه كرهته !
.. وماكنت اطيق اكثر عطرين احبهم ! منهم عطر زوجي يستخدمه المسكين انحرم منه ههههههالحمدلله ان هالفتره بس ب اول حملي وشهيتي صارت مفتوحه من الشهر الرابع الى الان ...
كان موضوع الحمل بالاتفاق بيني وبين زوجي ان بعد سنتين من زواجنا نبدا نفكر بالانجاب وكان هالقرار عن قناعه .. وبعد ذكرى زواجنا الثاني تم الحمل الحمدلله وبفضله .. واتوقع من دعاء امي فديت قلبها كانت تقول دايم
" ريوم اذا فيج شي قوليلي لاتخشين .. تقصد اسباب صحيه تمنع الحمل" ..
بس الموضوع هذا ماكان سهل بالنسبه لي! والحمدلله زوجي كان متفهم هالشي ♥♥ .. مجرد التفكير اني راح اكون مسئوله عن كائن حي ملازمني ٢٤ساعة يسببلي أرق .. حياتي بتتغير اكيد وان شاء الله للأفضل ! لازم اكون مستعده نفسياً على الأقل! وخطوه كبيره!
.
.
التغيرات اللي صارت لي مع الحمل احباااط :(
في مناطق بجسمي سمرت الاندر ارم و الركب والسترج مارك بمنطقة الصدر والسلولايت بشكل خفيف ..
مع اني حيل اهتم من ناحية العنايه وحبيت الاشياء اللي طلبتها وراح ارد اخذ منها لفترة مابعد الولاده .. بس اللي سمعته وقالولي ان هالاشياء طبيعيه وراح يرد الجسم مثل ماكان قبل الحمل وانها تتعلق بالهرمونات > نقول ان شاء الله!
والحكه مو طبيعيه .. احك جسمي لدرجة اني جرحت نفسي بس اللي انصدمت منه انه يترك اثر .. المكان اللي حكيته اغمج من باقي المنطقه ومبين!
عشان جذي نصيحه لاتحكون ودايم رطبوا جسمكم
والحين بعد هالفضفضه الصغنونه بقولكم عن عنايتي فترة الحمل …
١- چاي مخصص للحامل فيه اعشاب مفيده طعمه عادي ينشرب يعني مالتزمت فيه متى ماشتهيته خذيت ..
٢- بذور الشيا .. يا انها لذيذه وفوائدها كثيره ومهمه حبيتها مع ان مالها طعم! لاتسألوني شلون!
صرت اكلها الصبح مع العسل
٣-العسل اللي طلبته بعد من نفس الموقع
يوميا الصبح اذا تريقت ب البيت ..( قطعتين توست اسمر ادهنهم بقشطه او جبن كيري مع ملعقه كبيره بذور الشيا وعسل )
بالنسبه لـ اللوشنات والزيوت .. هذي المجموعه بزبدة الككاو من بالمرز خياليه وتقريبا لي شهرين استخدمها وخلاص اوشكت تخلص! برد اطلب منها ان شاء الله
-الزيت استخدمه لأسفل الظهر والفخوذ ترطيبه عميق وبشكل ملحوظ بس كنت استخدمه بعد الشور مباشره والجسم مبلل مسامات الجسم تكون متفتحه والبشره رطبه تمتص بشكل اسرع ولأن الزيت عالبشره الجافه يضر ماينفع .
- اللوشن *اللي بالنص* هذا مكتوب ( مساج لوشن ) حبيته خفيف ومن مكوناته الارقان وزبدة الشيا وزيت اللوز والكولاجين وكلهم مفيدين بشكل للبشره!
استخدمه للبطن والذراع وباقي الجسم
- اخر واحد *عاليمين*من مجموعة بالمرز مادري اقول عنه جل او زبدة ! تكوينته هُلاميه استخدم لمنطقة الصدر ترطيب وقلل من السترج مارك بشكل ملحوظ
الثلاثه هذولي انصح اي حامل أو بنت تعاني من السترج مارك *التشققات* والسلولايت انها تستخدمهم بتلاحظ التغيير بجسمها مع الاستمرار .
بس عنايتي ماكانت على الاشياء هذي .. كنت استعمل الزيوت اللي طلبتها من ايهيرب واكثر شي حبيته
زبدة الشيا وزيت اللوز و زيت الشيا .. غير الصابون الافريقي (الشور جل) مع كل باث استخدمه وتقريبا خلصته ريحته خيال موطبيعي!
ومع الاستخدام المستمر يخفف من علامات التمدد بالجسم .. زيت جوز الهند استخدمه مع ماسكات الشعر و سكرب القهوه اسويه اذا ماكان لي خلق ارطب جسمي بعد الشور لانه بتحسون بكمية الترطيب العميق بعد ماتطلعون يمكن تستغنون عن اي لوشن عقبه
اذا حابين تعرفون اكثر انا كاتبه عن االمنتجات ف البلوق هني ..
.. وو بس !
هذا بخصوص المنتجات اللي قلت اني بتكلم عنها اذا حبيتو التدوينه علموني!
واذا عندكم اي سؤال او استفسار .. تقدرون تتواصلون معاي عن طريق
email : reemani.28@hotmail.com
instagram : @reemani.28
twitter : @reemani_28
